माओवादी अध्यक्ष प्रचण्ड र प्रधानमन्त्री डा. बाबुराम भट्टराईले सहमति कार्यान्वयन गर्ने प्रतिवद्धता जनाएको भोलीपल्ट बैद्य पक्षीय गजुरेलले मधेसी मोर्चासँग भएको चारबुँदे सहमति कुनै पनि हालतमा कार्यान्वयन हुन नदिने चेतावनी !

माओवादी सचिव सीपी गजुरेलले संयुक्त लोकतान्त्रिक मधेसी मोर्चासँग भएको चारबुँदे सहमति कुनै पनि हालतमा कार्यान्वयन हुन नदिने चेतावनी  दिनु भएको छ । माओवादी अध्यक्ष प्रचण्ड र प्रधानमन्त्री डा. बाबुराम भट्टराईले सहमति कार्यान्वयन गर्ने प्रतिवद्धता जनाएको भोलीपल्ट बैद्य पक्षीय गजुरेलले भने चारबुँदे कार्यान्वयन असम्भव रहेको बताउनु भयो । शुक्रबार राजधानीमा आयोजित कार्यक्रममा सचिव गजुरेलले संविधान संसोधन गरेर नागरिकता वितरण गर्नु भन्दा नागरिकता नपाएका बास्तविक नेपाली पहिचान गरी नागरिकता दिन विशेष टोली खटाउनु पर्ने बताउनु भयो । नेपाली सेनालाई समावेशी बनाउन छाडेर तीन हजारको समूहगत प्रवेश भन्नुको आधार के हो भनि प्रश्न गर्दै गजुरेलले समूहगत प्रवेशले राष्ट्रियताको संरक्षणमा मद्दत नपुर्याउने दावी गर्नुभयो । जनतालाई झुक्याउन मधेसी दलहरुले तीन हजारको समूहगत प्रवेश गराउने एजेण्डा अगाडि सारेको आरोप लगाउँदै उहाँले समावेशीकरण गरिए त्योभन्दा पनि बढी मधेसीको सहभागी सुनिश्चित गर्न सकिने

तर्क गर्नुभयो ।

कार्यक्रममा फोरम गणतान्त्रिकका कार्यवाहक अध्यक्ष राजकिशोर यादवले मोर्चा सरकार ढाल्ने पक्षमा नरहेको स्पष्ट पार्नुभयो उहाँले भन्नुभयो-’शान्ति र संविधान अगाडि बढ्दा सम्म मोर्चाको समर्थन कायम रहन्छ ।’यादवले मोर्चा सरकार नछाडी सरकारलाई साधन बनाएर चार बुँदे सहमति कार्यान्वयन गर्न लाग्ने बताउनु भयो ।