(संसारका १७५ देशमा पढिने, फोहोरी राजनीतिबाट पुरै अलग, संसारभर छरिएर रहेका नेपालीहरुको साझा, स्वतन्त्र, अनलाइन पत्रिका www.NepalMother.com, एउटा क्लिकमा सबैथोक)

20130929

पुष्पकमल दाहाल पुत्र प्रकाश आइतबार विराटनगर विमानस्थलमा सुरक्षाकर्मीले बोक्ने सञ्चार सेट वाकिटकीसहित भेटिए

७५ जना जनपद र सशस्त्र प्रहरीको सुरक्षा घेराले पुगेन, प्रचण्डलाई लिन प्रकाश वाकिटकीसहित जहाजको ढोकैसम्म

- खिलानाथ ढकाल विराटनगर, असोज १३ 


प्रचण्ड पुत्र प्रकाश दाहाल कहिले तेस्रो बिहे गरेर चर्चा बटुल्छन्, कहिले डिएसपीको बर्दी र फूली लगाएर । एकीकृत नेकपा माओवादी अध्यक्ष पुष्पकमल दाहाल पुत्र प्रकाश आइतबार विराटनगर विमानस्थलमा सुरक्षाकर्मीले बोक्ने सञ्चार सेट वाकिटकीसहित भेटिए । रंगेलीस्थित एक कार्यक्रममा सहभागि हुन अध्यक्ष दाहाल मध्याह्न विमानस्थल आइपुग्नुपूर्वै प्रकाश भिभिआइपी कक्षमा सञ्चार सेटसहित देखिएका थिए ।
 
सञ्चार सेट बोकेर दाहाल सुरक्षाकर्मीसँग बाबु (अध्यक्ष)को सुरक्षा बन्दोबस्तीको जिम्मासाथ अगाडि नै पुगेका हुन् । केन्द्रीय सदस्य धर्मशिला चापागाईं, गोपी अछामीलगायत स्थानीय नेता कार्यकर्ता पनि भिआइपी कक्षमा दाहाल पुत्रसँगै थिए । (हेर्नुहोस् तस्विरमा)
 
दाहालको सुरक्षाको चाँजोपाँजो मिलाउन प्रकाश बिहानै विराटनगर आइपुगेका एमाओवादी स्रोतले जनाएको छ । बाबु प्रचण्डलाई स्वागत गर्न प्रकाश बुद्ध एयरको जहाजको ढोकैसम्म पुगेका थिए । ‘सुरक्षाकर्मीकै हैसियत’मा जस्तै देखिन्थे उनी ।
 
भिआइपी कक्षबाट कटेर आम मानिस रनवेमा जान नपाउने नियम प्रकाशलाई लागेको थिएन । दाहाल केहीअघि प्रहरी नायब उपरीक्षक डिएसपीको कपडा लगाएको तस्बिर फेसबुकमा राखेर विवादमा आएका थिए । पूर्वप्रधानमन्त्रीको हैसियतमा दाहालको सुरक्षाका लागि सशस्त्र र जनपद प्रहरीको टोली नै सरकारले खटाइदिएको छ । प्रहरी नायब उपरीक्षक रामजी केसीको नेतृत्वमा ५० जना सशस्त्र र नेपाल प्रहरीका नायब उपरीक्षक दानबहादुर मल्लको नेतृत्वमा २५ सुरक्षाकर्मी सरकारले दाहालको सुरक्षामा खटाएको छ ।
 
युद्धकालीन शैलीमा एमाओवादी नेताहरुले दोहोरो सुरक्षा लिइरहेकोमा सरकारले खारेज गरेको थियो । युद्धकालका बेला यस्ता सञ्चारसेट माओवादी नेता कार्यकर्ताले बोक्थे । ‘प्रकाशजीले कतै त्यै पुरानो गैरकानुनी सेट त बोकेको हो कि,’ जिल्लाका एक सुरक्षा अधिकारीले भने, ‘इजाजत लिएर निजी सेट बोक्न पनि पाइन्छ, तर उनले लिए/नलिएको थाहाँ भएन ।’ माओवादीको दोहोरो सुरक्षा संरचना खारेज गरिएको भने पनि दाहालको छुट्टै सुरक्षा सचिवालय अहिले पनि छ । पहिले लडाकु नेतृत्वमा रहेको निजी सुरक्षा सचिवालय अहिले नेताहरु छन् ।
 
केन्द्रीय सदस्य सन्तु दराईको नेतृत्वमा ७ जनाको सुरक्षा समितिमा दाहालपुत्र पनि सदस्य छन् । ‘अध्यक्षको सुरक्षा सचिवालयमा स्वकीय सचिव भुवनमणि खड्का र म पनि छौं,’ सेतोपाटीसँग प्रकाशले भने, ‘यो वाकिटकी हाम्रो निजी सचिवालयको हो ।’ इजाजत लिएर वाकिटकी प्रयोग गर्न पाइने कानुनी प्रावधान छ । दाहालपुत्रले वाकिटकी बोक्ने इजाजत लिए नलिएको खुलाएनन् ।
 
दाहालको सुरक्षामा खटिएका नेपाल प्रहरीका डिएसपी मल्लका भनाइमा दाहालपुत्र रहेको सचिवालय र सुरक्षाकर्मीबीच आन्तरिक सुरक्षाबारे दोहोरो कुराकानी हुन्छ । ‘सुरक्षाबारे हामी दुबैतर्फ सञ्चार सेटबाट कुराकानी भइरहेकै हुन्छ,’ मल्लले सेतोपाटीसँग भने, ‘तर उहाँले बोक्ने गरेको सेट हामीले बोक्नेजस्तो सरकारी सेट हैन, निजी हो ।’ दर्जनौं सुरक्षाकर्मी खटिएको पूर्वप्रधानमन्त्रीको सुरक्षामा प्रकाशले किन सक्रिय हुनुपर्यो‍ ? मल्ल भन्छन्, ‘त्यो उहाँको निजी सचिवालयको कुरा हो, कहिलेकाहीँ टाढा टाढासम्म सम्पर्क नहुन सक्छ, त्यस्तोमा हामीले प्रयोग गरिरहेका छौं ।’
 
रंगेलीमा विभिन्न पार्टीबाट कार्यकर्ता एमाओवादीमा प्रवेश गराउने कार्यक्रममा दाहाल विराटनगर आएका हुन् । उनलाई विमानस्थलमा लिन दुई दर्जन गाडी र सयौं मोटरसाइकल पुगेका थिए । - source : setopati

No comments:

Post a Comment

बेनाममा अरुलाई गाली गलौज गर्दै जथाभाबी कमेन्ट लेख्नेहरु लाई यो साईटमा स्थान छैन तर सभ्य भाषाका रचनात्मक कमेन्ट सुझाब सल्लाह लाई भने हार्दिक स्वागत छ । तल Anonymous मा क्लिक गर्नुश अनी आफ्नो सहि नाम र सहि ईमेल सहित ईंग्लिश वा नेपाली मा कमेन्ट लेखी पठाउनुश, अरु वेबसाईट र यस् मा फरक छ बुझी दिनुहोला धन्यवाद । address for send news/views/Article/comments : Email - info@nepalmother.com - सम्पादक