(संसारका १७५ देशमा पढिने, फोहोरी राजनीति
र छाडापनबाट
पुरै अलग, संसारभर छरिएर रहेका नेपालीहरुको साझा, स्वतन्त्र, अनलाइन पत्रिका www.NepalMother.com, एउटा क्लिकमा सबैथोक)

20101110

कुनै एक पार्टीसँग सेना र हतियार रहन हुन्न भन्ने नै सबैभन्दा चासो र चिन्ताको विषय : प्रधानमन्त्री माधवकुमार नेपाल

प्रधानमन्त्री माधवकुमार नेपालले सहमतिका लागि जारी प्रयासमा कुनै एक पार्टीसँग सेना र हतियार रहन हुन्न भन्ने नै सबैभन्दा चासो र चिन्ताको विषय रहेको बताउनुभएको छ । प्रधानमन्त्री नेपालले तिहार, नेपाल संवत् ११३१ र छठ पर्वको अवसरमा मङ्गलबार प्रधानमन्त्री निवास बालुवाटारमा आयोजना गर्नुभएको शुभकामना चियापान समारोहमा सञ्चारकर्मीहरूको जिज्ञासामा यो जानकारी दिनुभएको हो । राष्ट्रिय सहमतिको सरकारका लागि उहाँले प्रधानमन्त्री पदबाट राजीनामा दिएको चार महिना बित्दासमेत जिम्मेवार दलहरूले सहमति कायम गर्न नसकेको सन्दर्भमा सञ्चारकर्मीहरूले जिज्ञासा राखेका थिए । उहाँले अहिले छलफलका सबैभन्दा मूल विषय शान्तिप्रक्रियालाई सार्थक निष्कर्षमा पुर्‍याउने, संविधान निर्माण र सत्ता...
साझेदारी रहेको बताउनुभयो । "सबैभन्दा चिन्ता र चासोको विषय कुनै एक राजनीतिक पार्टीसँग सेना र हतियार रहन हुँदैन भन्ने हो । निर्वाचनको छ महिनाभित्र त्यसलाई सम्पूर्ण रूपमा समाधान गर्ने भनिएको थियो तर साढे तीन वर्षमा पनि हुन सकेको छैन । अहिले पनि विशेष जोड त्यसैमा छ । त्यसलाई सम्बोधन गर्नेबित्तिकै धेरै कुरा टुङ्गो लाग्नसक्छ", उहाँले भन्नुभयो । संविधान निर्माणमा पनि केही प्रगति गरिएको उल्लेख गर्दै प्रधानमन्त्री नेपालले सत्ता साझेदारीका विषयमा अलिकति गहन छलफल गर्नुपर्ने देखिएको र त्यसलाई पनि टुङ्गोमा पुर्‍याउन सकिने बताउनुभयो ।
प्रधानमन्त्री नेपालले सहमतिका लागि राजनीतिक दलहरूका एकअर्काका भनाइ के र कति न्यायोचित छन् ? तिनका संवेदनशीलता र भनाइ राम्ररी मनन गरेर सम्बोधन गर्नसक्ने हो भने समाधान निकाल्न गाह्रो नरहेको बताउनुभयो ।
सहमतिका लागि हात्तीवनमा भएको पहिलो प्रयास -शीर्ष नेताहरूको गोप्य बैठक)ले सहयोग पुर्‍याएको र बुधबारको बैठकले पनि सहयोग पुर्‍याउने अपेक्षा गर्नुभयो । बुधबार हुने भनिएको शीर्ष बैठकले नै निकास निकाल्ने विश्वास चाहिँ प्रधानमन्त्रीले व्यक्त गर्नुभएन । उहाँको भनाइ थियो- सहमतिका लागि बुधबारको बैठकले पनि उपाय निकाले राम्रो हुन्थ्यो तर त्यसका लागि तिहार इत्यादिका कारणले दलहरूबीच छलफलको समय पुगेन । अझै पनि समय बाँकी छ । योबीचमा दुईपक्षीय छलफलहरू गर्ने हो भने एउटा उपाय निकाल्न सकिन्छ कि भन्ने मेरो अपेक्षा छ ।
राजनीतिक गतिरोध समाधान गर्ने उपाय निकाल्न सकिने तर त्यसका लागि अलिकति गहन छलफल गर्नुपर्ने महसुस गर्नुभएका प्रधानमन्त्रीसँग सहमतिका लागि आएको सत्ता नेतृत्वसम्बन्धी चक्र प्रणालीबारे जिज्ञासा राखिएको थियो । उहाँले भन्नुभयो- यसबारे विभिन्न धारणा आएका छन्, विचार मन्थन भइरहेका छन्, यसमा पनि हामी कुनै न कुनै उपाय निकाल्छौँ ।
सरकारको गठन कुन प्रणालीमा ठीक होला भन्ने व्यक्तिगत विचार सोध्दा चाहिँ उहाँले 'पछि भनौँला' मात्र भन्नुभयो ।
प्रधानमन्त्री नेपालले आयोजना गर्नुभएको चियापान समारोह दिउँसो २ बजेदेखि प्रारम्भ भएको थियो । समारोहमा विभिन्न राजनीतिक दलका नेताहरूले आपसमा शुभकामना साटासाट गरेका थिए । अनि नेकपा एमाले कार्यकर्ताहरूको बाक्लो उपस्थिति रहेको सो समारोहमा कार्यकर्ताहरूले नेता र मन्त्रीहरूलाई भेट्न पाएका थिए

No comments:

Post a Comment

बेनाममा अरुलाई गाली गलौज गर्दै जथाभाबी कमेन्ट लेख्नेहरु लाई यो साईटमा स्थान छैन तर सभ्य भाषाका रचनात्मक कमेन्ट सुझाब सल्लाह लाई भने हार्दिक स्वागत छ । तल Anonymous मा क्लिक गर्नुश अनी आफ्नो सहि नाम र सहि ईमेल सहित ईंग्लिश वा नेपाली मा कमेन्ट लेखी पठाउनुश, अरु वेबसाईट र यस् मा फरक छ बुझी दिनुहोला धन्यवाद । address for send news/views/Article/comments : Email - info@nepalmother.com - सम्पादक