सामान्य प्रशासनमन्त्री लालबाबु पण्डितले गैर आवासीय नेपालीहरुका विषयमा हालै गरेको टिप्पणीप्रति गम्भीर ध्यानाकर्षण

 वर्तमान सरकारका सामान्य प्रशासनमन्त्री लालबाबु पण्डितले गैर आवासीय नेपालीहरुका विषयमा हालै गरेको टिप्पणीप्रति मेरो गम्भीर ध्यानाकर्षण भएको छ | म संयुक्त राज्य अमेरिकामा रहेका आम गैरआवासीय नेपालीहरुको हक,अधिकार र भावनाको प्रतिनिधित्व गर्दै यो गरिमामय संस्थाको अध्यक्षको प्रत्यासीको रुपमा मैदानमा आएको छु | मन्त्री पण्डितको टिप्पणीलाई मैले सम्पूर्ण गैरआवासीय नेपालीहरुप्रतिको अपमानको रुपमा लिएको छु | मुलुकको मन्त्री जस्तो गरिमामय पदमा रहेको व्यक्तिले कुनै पनि विषयमा यसरी हल्काफुल्का र गैर जिम्मेवार ढंगले टिप्पणी गर्नु भनेको आफ्नो पदीय मर्यादाको सम्मान गर्न समेत नसक्नु हो भन्ने मेरो ठम्याई छ | म मन्त्री पण्डितले गैर आवासीय नेपालीहरुप्रति लक्षित गरेर गर्नु भएको टिप्पणीको घोर भर्त्सना गर्दछु | मन्त्री पण्डितले गैर आवासीय नेपालीहरुको अपमान गर्दै व्यक्त गरेका भनाइहरु पूर्ण रुपमा गैर कानुनी तथा नेपालको संबिधान विरुद्ध छन् | साथै मन्त्री पण्डितको यस्तो अभिव्यक्ति संयुक्त राज्य अमेरिकाको कानून विरुद्ध छ। हामी गैर आवासीय नेपालीहरु जहाँ बसे पनि त्यो देशको भूगोलको कानूनको पूर्ण पालना गरेर बसेका छौं | तसर्थ मन्त्री पण्डितको अभिव्यक्ति र हामी गैर आवासीय नेपालीहरुप्रति लक्षित भनाईले प्रष्ट पार्दछ उहाँ मन्त्री जस्तो गरिमामय पदमा बहाल रहिरहन योग्य हुनुहुन्न | तसर्थ म यसै प्रेस विज्ञप्ति मार्फत मन्त्री पण्डितको अविलम्ब राजीनामाको माग गर्दछु | मन्त्री पण्डितको पदीय मर्यादा विपरितका अभिव्यक्तिहरुले सम्पूर्ण गैर आवासीय नेपाली समाजमा त्रासको वातावरण सिर्जना गरेको छ। उहाँको अभिव्यक्तिले उहाँमा
कानुनी रुपमा अन्य देशमा स्थायी बसोबासको अधिकार प्राप्त गर्नु भनेको नागरिकता लिनु अथवा नागरिक सरहनै हुनु होइन,तसर्थ यसले सरकारी सेवामा नियुक्तिको लागि कुनै प्रतिबन्ध लाग्दैन भन्ने ज्ञान समेत नभएको देखियो | संयुक्त राज्य अमेरिकामा वा अन्य कुनै पनि देशमा पीआर अथवा ग्रीनकार्ड लिएर बसोबास गर्नेहरुलाई कानुनी बसोबासको भन्दा अन्य कुनै राजनीतिक अधिकारहरु हुँदैन | मन्त्री पण्डितका यस किसिमका गतिबिधिले अमेरिका लगायत अरु कुनै देशको पि आर तथा ग्रीनकार्ड लिन चाहने अन्य नेपालीहरुबीच त्रासको वातावरण सिर्जना गरेको छ। यसप्रति सम्पूर्ण गैर आवासीय नेपालीहरुले बिरोध जनाउनु पर्दछ | साथै गैरआवासीय नेपाली समुदायको सदस्य तथा गैरआवासीय नेपाली अमेरिकाको अध्यक्ष पदको उम्मेदवारको नाताले म न्यूयोर्कमा वाणिज्य दूतावास बन्द गर्ने हालैको सराकरी निर्णयप्रति आपत्ति जनाउँदछु | यो निर्णयलाई मैले नेपाल सरकारद्वारा गैरआवासीय नेपाली समुदायको हितका विरुद्धको झटकाका रुपमा लिएको छु | म नेपाल सरकारलाई यो निर्णय तत्काल फिर्ता लिंदै पुन: वाणिज्य दूतावास खोल्नका लागि आग्रह गर्दछु | यदि यसो नगरिएको खण्डमा यो नेपाल सरकारले गैर आवासीय नेपालीहरुप्रति देखाएको नकारात्मक कृयाकलापको अर्को उदाहरण हुनेछ। जसले सरकार आफ्ना प्रवासी नागरिकहरुको समस्याप्रति संवेदनशील नभएको पुष्टि गर्दछ भन्ने मलाई लागेको छ | यसतर्फ नेपाल सरकारको तत्काल ध्यानाकर्षण होस् | अन्त्यमा नजिक आउँदै गरेको विक्रम संवतको नयाँ वर्ष २०७१ का अवसरमा देश विदेशमा रहनु भएका सबै नेपालीहरुप्रति सुख,स्वास्थ्य,समृद्धि एवं उत्तरोत्तर प्रगतिका लागि हार्दिक मंगलमय शुभकामान व्यक्त गर्दछु | साथै एनआरएन अमेरिकाको आगामी निर्वाचनमा मेरा पक्षमा मतदान गर्नु हुन एनआरएन अमेरिकाका सबै सदस्यहरुमा विनम्रतापूर्वक अपील गर्दछु | धन्यवाद
- खगेन्द्र जीसी अध्यक्षका उम्मेदवार,एनआरएन अमेरिका