हेम–सरिता फाउण्डेशनद्वारा काठमाडौंको शंकरापुर नगरपालिकाको घुमारका भुकम्प पिडित परिवारका लागि नगद आर्थिक सहयोग प्रदान

हेम–सरिता पाठक  फाउण्डेशनले काठमाडौंको शंकरापुर नगरपालिकाको घुमारका भुकम्प पिडित परिवारका लागि नगद आर्थिक सहयोग प्रदान गरेको छ । भुकम्पमा परी घरवार क्षति भएका तथा चरम गरीबीको अवस्थामा रहेका व्यक्तिहरुलाई आय आर्जन गर्ने प्रतिवद्धता र प्रस्तावका आधारमा २० हजारदेखि एक लाख सम्म नगद
आर्थिक सहयोग प्रदान गरिएको हो ।

एमालेका वरिष्ठ नेता एवं पूर्व प्रधानमन्त्री माधवकुमार नेपालले शनिबार आयोजित एक समारोहका वीच उनीहरुलाई आय आर्जन आर्थिक सहयोग रकम हस्तान्तरण गरे । हेम–सरिता पाठक फाउण्डेशनले करिव २० लाख रुपियाँं आर्थिक सहयोग वितरण गर्ने घोषणा गरेको छ । स्थानीय समुदायको सिफारिसमा यो रकम प्रदान गरिएको हो ।

त्यसैगरी फाउण्डेशनले घुमारस्थित उग्रतार माध्यमिक विद्यालयको भुकम्पबाट क्षति भएको एउटा भवन पुनर्निमाण गरेको छ । करिव ६ लाखको लागतमा पुनर्निर्माण गरिएको सो भवन सोही सुमारोहमा बरिष्ठ कलाकारद्वय मदनकृष्ण श्रेष्ठ र हरिवंश आचार्यले संयुक्त रुपमा विद्यालयका प्रअलाई हस्तान्तरण गरे । सो विद्यालयलाई नमुना विद्यालयको रुपमा विकास गर्न विगत पाँंच वर्षदेखि हेम–सरिता पाठक फाउण्डेशनले ठूलो लगानी गरेको छ । फाउण्डेशनका तर्फबाट भवन निर्माण,छात्रवृत्ति र थप शिक्षकको व्यवस्थाका लागि गरी ९४ लाख खर्च गरिसकेको छ ।

पाठक फाउण्डेशन,युएस नेपाल वेलफेयर सासाइटी र अमेरिकाकै गामा नामका संस्थाको संयुक्त सहभागितामा सोही क्षेत्रका भुकम्प पिडितका लागि १० वटा निजी आवास बनाउन सुरु गरिएको छ । निर्माण सम्पन्न भइसकेको एउटा घर शनिबार नै प्रमुख अतिथी पूर्व प्रधानमन्त्री नेपालले हस्तान्तरण गरे । सो घर भुकम्पबाट घरवारबिहीन भएकी एकल महिलालाई हस्तान्तरण गरियो ।
कार्यक्रमलाई संवोधन गर्दै पूर्व प्रधानमन्त्री नेपालले भुकम्प पिडितका लागि नगद सहयोग र निजी घर निर्माण गरेर फाउण्डेशनले उदाहरणीय काम गरेको बताए । यस्ता कामले सबैलाई हौसला र प्रेरणा मिल्ने पनि नेता नेपालले बताए ।