म झन् निरुत्तर भएँ र फर्केँ लाहुर तिरै !

 धमलाको हमला, 

धमला माथिको हमला,  

शर्मिलाको राम कहानी 

बेकार बदनाम छ काजु 

एलिजाको डग्गी डान्स

भेलु बाजेका सन्देश र वाणीहरू  

भाइरलै भाइरल छन् जताततै 

बेफुर्सदी छन् युट्युबरहरु 

टिकटकमै मस्त छन् जनहरू  

फेसबुके र टिकटके न्यायाधीश 

चलिरहेछ राक्षसी राज निर्धक्क 

शती जान तयार छन् लाम लागेर 

कहिले यता, कहिले उता

कहिले बोकेका छन् 

कहिले बोकाएका छन् 

भारी बोक्न तयार छन् गधाहरू 

भाषणमा राशन भइरहेको छ वितरण  

लाज छोप्ने धरो खुस्किसकेको छ 

हुन त हो लाज मान्दैनन् गोरुहरू 

अन्धाहरू देख्दैनन् धरो खुस्किए पनि  

रुवाबासी छ अहिले जताततै 

हत्या हिंसा, आतङ्कबाट पीडितहरूको 

मिटरब्याजी साहुबाट पीडितहरूको

बलात्कार बाट पीडितहरूको 

न्याय मूर्ति आफै न्याय पाइन भन्दै 

घर तिर लागे रे रुँदै कराउँदै !

यत्तिकैमा लामो लाइन देखियो मानिसको 

लाग्यो जनता उठेछन् क्यारे राक्षसी राज विरुद्ध 

तर नजिकै गएर हेर्दा देखियो 

त्यो लाहुर हिँडेको लाइन रहेछ 

म झन् निरुत्तर भएँ र फर्केँ लाहुर तिरै !

नफर्कूँ पनि कसरी, पापी पेटको सवाल जो छ !  

- रामप्रसाद खनाल, मार्च २८, २०२३