माओवादीले आफ्ना लडाकू प्रमुख पासाङलाई मानार्थ रथी र डेपुटी कमाण्डर चन्द्रप्रकाश खनाल बदलेवलाई मानार्थ उपरथी दिनु पर्ने सर्त अघि सारे

प्रधानसेनापती पछीको दोस्रो र तेस्रो ठुलो पद रथी र उपरथी पद माओवादीलाई चहिए पछी ! 

माओवादीले आफ्ना लडाकू प्रमुख नन्दकिशोर पुन पासाङलाई मानार्थ रथी बनाउनु पर्ने सर्त अघि सारेको छ । ६० जनालाई मेजर पदमात्र दिने र ६ हजार ५ सयलाई सामुहिक समायोजन गर्ने भन्दै सेनाले सरकारलाई नयाँ प्रस्ताव बुझाएको सार्वजनिक भएलगत्तै माओवादीले यस्तो सर्त अघि सारेको हो । माओवादी जनरल स्टाफको बुधबार बसेको बैठकले आफ्ना लडाकू प्रमुख पासाङलाई मानार्थ रथी र डेपुटी कमाण्डर चन्द्रप्रकाश खनाल बदलेवलाई मानार्थ उपरथीको सम्मान दिनु पर्ने माग गरेको छ ।बैठकको निर्णयबारे पाँचौं डिभिजनका कमाण्डर यमबहादुर अधिकारी प्रतिक्षाले अनलाइनखबरसँग भन्नुभयो-’नेतृत्वलाई मानार्थ रथी र उपरथीको सम्मान दिनुपर्छ । उहाँहरुले फुली लगाउनुहुन्छ र अवकाशमा जानुहुन्छ ।’ बैठकले समायोजनपछि नेपाली सेनाको नेतृत्वमा बन्ने महानिर्देशनालयको सहायक कमाण्डर (रथी)लडाकूले पाउनु पर्ने अडान दोहोर्‍याएको छ । ‘हामीलाई कमाण्डर दिने हो भने २ जनालाई वि्रगेडियर जनरल दिए हुन्छ’ प्रतिक्षाले भन्नुभयो-’हैन भने सहायक कमाण्डर (उपरथी) हामीले पाउनुपर्छ र तीन जना वि्रगेडियर जनरल हुनुपर्छ ।’ सेनाले अधिकतम मेजरमात्र दिन सकिने सहितको
नयाँ प्रस्तावप्रति असहमित जनाउँदै जनसेनाको जनरल स्टाफ वैठकले आफ्ना माग पुरा गराउन राजनीतिक तहमा सहमति गर्न नेतृत्वसँग माग गरेको छ ।

माओवादीले समायोजन रोजेर ९ हजार ७ सय ५ लाई समायोजन गर्नु पर्ने अडान छाडेको छ । दलहरुबीच भएको सहमति अनुसार ६ हजार ५ सयलाई मात्र समायोजन गर्न सहमत भएको माओवादीले समायोजन रोजेर पनि सेनामा जान नपाउनेहरुका लागि भने क्षतिपूर्तिसहित अवकासमा पठाउनु पर्ने ठहर गरेको छ । ‘समायोजन रोज्न लगाएर अवकासमा पठाउँदा उनीहरुको अपमान गरेको हुन्छ’ प्रतिक्षाले भन्नुभयो-’त्यसले ६ हजार ५ सयभन्दा बढीलाई क्षतिपूर्तिसहित अवकास प्याकेज दिनुपर्छ । बैठकले लडाकू समायोजन गर्दा उपरथीदेखि तल्लोतहसम्मको दर्जा मिलान हुनु पर्नेमा जोड दिएको छ ।

बैठकले लडाकू समायोजनबारे नेपाली सेनाले अघि सारेको प्रस्तावलाई सकारात्मक तर पूर्ण नभएको ठहर गरेको छ । सेनाले ६ हजार लडाकूलाई सामूहिक समायोजन गर्ने, लडाकूलाई मेजरसम्म दिने प्रस्ताव हालै मात्र प्रधानमन्त्री एवं विशेष समितिका अध्यक्ष डा. बाबुराम भट्टराईलाई बुझाएको थियो ।

के थियो प्रस्तावमा ?

करिव एक साताअघि नेपाली प्रधानसेनापति छत्रमानसिंह गुरुङले प्रधानमन्त्रीलाई बुझाएको समायोजनसम्बन्धी नयाँ प्रस्तावमा ६ हजार ५ सय लडाकूलाई समूहगत प्रवेश गराउने तर अधिकतम मेजरभन्दा माथि नदिने उल्लेख गरिएको छ । माथिल्लो दर्जा मागिरहेको माओवादीलाई मनाउन सेनाले समूहगत प्रवेश स्वीकारेको छ भने ३ सय ५० जनालाई अधिकृत तह दिने र बि्रजकोर्षको समय आधा घटाउने प्रस्ताव गरेको छ ।

सेनानिकट स्रोतका अनुसार माओवादी सैन्य इन्चार्ज बर्षमान पुन र लडाकू कमाण्डर नन्दकिशोर पुन तथा नेपाली सेनाका रथी दमनबहादुर घलेवीच दर्जनौपटक छलफल भएपछि यो सहमति भएको हो । माथिल्लो पोष्ट मागिरहेका लडाकूलाई शान्त पार्न समुहगत प्रवेशको ब्यबस्था गरिएको यस्तो प्रस्तावमा अनन्त र पासाङ सहमत भएपनि बुधबारको जनरल स्टाफ वैठकमा पुरानै अडानमा रहने र ती माग पुरा गर्न राजनीतिक तहमा सहमति हुनुपर्ने निर्णय गरिएको छ । बाबुराम भट्टराई प्रधानमन्त्री नियुक्त भएलगत्तै माओवादी र नेपाली सेनावीच बिश्वासको वातावरण बनाउन प्रधानसेनापति गुरुङका नातेदार घले र लडाकू कमाण्डर पासाङवीच नियमित कुराकानी र छलफलको सुरुवात गरिएको थियो । वालुवाटारमै वसेर उनीहरुबीच जर्दनौपटक छलफल भएपछि समायोजनको नयाँ खाकामा सहमति भएको सैनिक स्रोतको दावी छ ।