(संसारका १७५ देशमा पढिने, फोहोरी राजनीतिबाट पुरै अलग, संसारभर छरिएर रहेका नेपालीहरुको साझा, स्वतन्त्र, अनलाइन पत्रिका www.NepalMother.com, एउटा क्लिकमा सबैथोक)

20130617

महाकाली नदीमा आएको बाढीले कार्यालयसहित नदी छेउछाउका ५० भन्दा बढी घरहरु बगाएको छ, एक महिला पनि नदीमा बगेकी छिन् । सयौँ घर जोखिममा परे !

महाकाली नदीमा आएको भीषण बाढीले नेपाल र भारत दुबै तर्फ गम्भीर क्षति ! हेर्नुस् भिडियो र फोटो सहित समाचार विवरण

भारतको बाँधले नदीको धार नेपालतिर : भारतले आफ्नो क्षेत्र सुरक्षित पार्न महाकाली नदी छेउ किनारामा पक्की तटबन्ध निर्माण गरेपछि बाढी नेपाल पसेको हो
इन्द्र साउ/ दार्चुला, असार ३ : महाकाली नदीमा आएको बाढीले कार्यालयसहित नदी छेउछाउका ५० भन्दा बढी घरहरु बगाएको छ । सयौँ घर जोखिममा परेका छन् । बाढीले बाङ्गबडाका केही घर तथा जिल्ला वन कार्यालय, भू संरक्षण कार्यालय, जिल्ला अस्पतालको भवन पनि बगाएको  छ ।
यस्तै व्रह्मदेव गाविसको कालागाड जलविद्युत परियोजनाको पावर हाउस पनि बाढीले बगाएको छ । दुर सञ्चार कार्यालय र जिल्ला प्रहरी कार्यालय पनि जोखिममा परेका छन्  । 
एक महिला पनि नदीमा बगेकी छिन् । स्थानीय धाप गाविसकी झण्डै ४० वर्षीया  सरस्वती रैखोला नदीमा बगेकी हुन् । महाकाली नदीको बाढीले दार्चुला सदरमुकाम खलङगाका ३० वटा घर बगाइसकेको छ । बाढी निक्कै ठूलो आएकोले सडक पनि बगाएको छ । जोलजिवीको झोलुङ्गे पुल पनि बाढीले बगाएको छ । 
लगातारको भीषण वर्षाले गर्दा बस्तीमा बाढी पसेपछि खलङ्गाका स्थानीयहरु त्रसित बनेका छन् । जिल्ला प्रशासन कार्यालयले सुरक्षित स्थानतर्फ जान आग्रह गरेको छ । अहिले महाकाली नदीको बहाव ४ लाख ४० हजार ७ सय १६ क्युसेक छ ।  
बाढीले सदरमुकाम खलंगामा र सीमावर्ती धार्चुलामा सवारी साधन समेत ठप्प रहेको जिल्ला प्रहरी कार्यालयले जनाएको छ । बाढीले जिल्लाका धाप, दत्तु, उकु र लाली गाविसमा पनि कटान गरिरहेको छ ।
भारतले आफ्नो क्षेत्र सुरक्षित पार्न महाकाली नदी छेउ किनारामा पक्की तटबन्ध निर्माण गरेपछि बाढी नेपाल पसेको हो । भारतीय सिमानाको छिरकिल्लामा रहेको धौलीगंगा जलविद्युतको बाँधमा पानी भरिएकाले बाँध फुट्ने खतरा बढेको छ । अहिले नेपाली सेना, शसस्त्र प्रहरी, नेपाल प्रहरी र स्थानीय बासिन्दा उद्धारमा खटिएका छन् । 
यसैबिच कञ्चनपुरको भीमदत्त नगरपालिका पिपरैया नजिक महाकाली नदीको बीच भागमा थुनिएका २३ जना मजदुरको सकुशल उद्धार गरिएको छ । जिल्ला सदरमुकाम महेन्द्रनगरबाट ट्रक र ट्रिपरसहित गएराति बालुवा र ढुङ्गा ल्याउन गएका मजदुरहरु नदीमा आएको बाढीका कारण पिपरैया नजिकैको महाकाली नदीको बीच भङ्गालोमा थुनिएका थिए । उनीहरुको स्थानीय बासिन्दा, प्रहरी सशस्त्र प्रहरी र नेपाली सेनाले ट्युबको मद्दतले उद्धार गरिएको हो  ।
यस्तै अविरल वर्षाका कारण कञ्चनपुरको रौटेला खोलामा बाढी आउँदा भीमदत्त नगरपालिकाको बाराकुण्डा बस्ती डुबानमा परेको छ । बाढीबाट ३२ घर डुबानमा परेका छन् । घर डुबानमा परेपछि स्थानीय बासिन्दा सुरक्षित स्थानतर्फ लागेको स्थानीय पूर्णबहादुर कुँवर बताएका छन् । 
तस्बिर : सौजन्य (पत्रकार कमलराज जोशी र नेपाली सेना) 

No comments:

Post a Comment

बेनाममा अरुलाई गाली गलौज गर्दै जथाभाबी कमेन्ट लेख्नेहरु लाई यो साईटमा स्थान छैन तर सभ्य भाषाका रचनात्मक कमेन्ट सुझाब सल्लाह लाई भने हार्दिक स्वागत छ । तल Anonymous मा क्लिक गर्नुश अनी आफ्नो सहि नाम र सहि ईमेल सहित ईंग्लिश वा नेपाली मा कमेन्ट लेखी पठाउनुश, अरु वेबसाईट र यस् मा फरक छ बुझी दिनुहोला धन्यवाद । address for send news/views/Article/comments : Email - info@nepalmother.com - सम्पादक