मेरो शरीर रगताम्य पक्कै छ, तर म ढलीसकेको छैन - "स.ज.क."

म थाकिसकेको छैन,

म गलिसकेको छैन,

राष्ट्रघातीहरु हो !

तिमीहरुसंगको यो लडाइमा

मेरो शरीर रगताम्य पक्कै छ,

तर म ढलीसकेको छैन |

तिम्रा आयतित एजेन्डाहरुले

मुर्छा पारेको मेरो देश,

ब्युंझि नसकेको भए पनि

मेरो आशा भने अझैं 

मरिसकेको छैन |

यो रण-मैदानमा मेरो “चन्द्र-सुर्य” बोकी दिने

सह-योद्धा भेटि नसकेको भए पनि,

छात्ती भित्र लुकाई राखेको

नेपाल आमाको आंचल र

यो देशको अस्मिता अझैं 

लुटीइसकेको छैन |

अशान्ति, अस्थिरता र अराजकताले

यो देश अक्रान्त भए पनि

एकदिन अवश्य मेची-महाकाली जुर्मुर्याई उठ्ने

मेरो अटल विश्वास अझैं

डगमगाइ सकेको छैन |

आइपरे, गोर्खाली-शहिदहरु

चिहानबाटै उठेर

"मेरो राष्ट्र" जोगाइछाड़ने छन्,

खबरदार!

यो लडाइ जिती सकेयौं भन्ने नठान,

यहाँ, वीर सपुतले घुंडा अझैं

टेकिसकेको छैन,

यो माटोमा गोर्खालीको खडेरी अझैं

परिसकेको छैन ||

म थाकिसकेको छैन,

म गलिसकेको छैन,

राष्ट्रघातीहरु हो!

तिमीहरुसंगको यो लडाइमा

मेरो शरीर रगताम्य पक्कै छ,

तर म ढलीसकेको छैन ||