(संसारका १७५ देशमा पढिने, फोहोरी राजनीतिबाट पुरै अलग, संसारभर छरिएर रहेका नेपालीहरुको साझा, स्वतन्त्र, अनलाइन पत्रिका www.NepalMother.com, एउटा क्लिकमा सबैथोक)

20131024

छोराको हत्यारालाई कारबाही हुनुपर्ने माग राख्दै आएका गोरखा, फुजेलका नन्दप्रसाद अधिकारी र उनकी पत्नीले फेरि तेस्रो आमरण अनशन सुरु गरे

छोराको हत्यारालाई कारबाही हुनुपर्ने माग राख्दै आएका गोरखा,
फुजेलका नन्दप्रसाद अधिकारी र उनकी पत्नीले फेरि आमरण अनशन सुरु गरेका छन् । महिनौंदेखि वीर अस्पताल बस्दै आएका उनीहरूको यो तेस्रो आमरण अनशन हो । हाल स्पेशल वार्डको बेड नम्बर १६ र १७ मा बस्दै आएका दम्पतीले माग पूरा नभएसम्मका लागि कुनै हालतमा नतोड्ने भन्दै बिहीबार बिहान ११ बजेबाट अनशन सुरु गरेका हुन् । माग पूरा नभएसम्म अब कुनै हालतमा अनशन नतोड्ने उनीहरूले बताए । अधिकारी दम्पतीले अनशन सुरु गरेलगत्तै सिंहदरबारमा गृहसचिव, प्रधानमन्त्री कार्यालयका सचिव र प्रहरीका अधिकारीबीच बैठक बसेर त्यसबारे छलफल भएको थियो । गृह स्रोतका अनुसार सरकारले अधिकारी दम्पतीको माग पूरा गर्नेबारे
विगतमा सुरक्षा संयन्त्रलाई दिइएको निर्देशनको कार्यान्वयन कहाँ पुग्यो र अब के गर्न सकिन्छ भनेर चासो देखाएको थियो । अधिकारी दम्पतीका १७ वर्षीय छोरा कृष्णप्रसादलाई माओवादी कार्यकर्ताले २०६१ जेठ २४ गते अपहरण गरी हत्या गरेका थिए । त्यसको एक वर्षपछि अधिकारी दम्पतीले माओवादी नेतृ हिसिला यमीकी पीए जानुका पौडेल, तथा माओवादी कार्यकर्ताहरू छविलाल पौडेल, पर्शुराम पौडेल, भीमसेन पौडेल, विष्णु तिवारी, कालीप्रसाद अधिकारी, बाबुराम अधिकारी र रामप्रसाद अधिकारीले छोराको हत्या गरेको
अभियोग लगाउँदै उनीहरुविरुद्ध किटानी जाहेरी प्रहरीमा दिएका थिए । तर प्रहरीले कुनै पनि अभियुक्तहरूविरुद्ध अनुसन्धान नथालेपछि आन्दोलनमा उत्रेका अधिकारी दम्पती गोरखाकै नेता बाबुराम भट्टराई प्रधानमन्त्री भएपछि न्याय पाऊँ भनी उनलाई भेट्न काठमाडौं आएका थिए । भेट्न नपाएपछि उनीहरू प्रधानमन्त्री निवास बालुवाटारमै अनशनमा बस्न थालेका थिए । प्रहरीले कहिले उनीहरूलाई समातेर गोरखै पुर्‍याई छाडिदिने, कहिले अस्पताल लगेर भर्ना गरिदिने गर्दै आएको थियो । गत जेठ ३१ गते प्रहरीले उनीहरूमा पागलपन भएको भन्दै मानसिक अस्पतालमा भर्ना गरिदिएको थियो । त्यसको सर्वत्र आलोचना भएपछि अस्पतालले उनीहरू मानसिक हिसाबले स्वस्थ नै भएको भन्दै असार ७ गते डिस्चार्ज गरिदिएको थियो । अस्पतालबाट निक्लेको केही क्षणमै उनीहरू अन्तरिम मन्त्रिपरिषदा अध्यक्ष खिलराज रेग्मीलाई भेटेर आफ्ना कुरा राख्न बालुवाटार पुगेका थिए । त्यहाँ पहिलेजस्तै प्रहरीले रोकेपछि उनीहरू सडक पेटीमै आमरण अनशनमा बसेका थिए । अनशनमा बसेको आठौं दिन अधिकारी दम्पतीको हालत नाजुक बन्दै गएपछि उनीहरूलाई प्रहरीले वीरअस्पताल लगेर छाडिदिएको थियो । अस्पतालमा पनि उनीहरू थुप्रै साता अनशनमै बसेपछि स्लाइन दिएर उनीहरूको ज्यान जोगाइएको थियो । मन्त्रिपरिषदा अध्यक्ष खिलराज रेग्मी आफैं भेट्न गएर उनीहरूको माग पूरा गर्न कुनै कसर बाँकी नराख्ने आश्वासन दिएर अधिकारी दम्पतीलाई अनशन तोड्न आग्रह पनि गरेका थिए । सरकारकै निर्देशनमा प्रहरीले रामप्रसाद अधिकारीलाई भदौ २० मा पक्राउ गरी अनुसन्धान अघि बढाएको थियो । अधिकारीविरुद्ध अनुसन्धान भएको भन्दै सरकारले आग्रह गरेपछि उनीहरूले अनशन बसेको ४५ दिनपछि भदौ २२ मा त्यसलाई तोडेका थिए । प्रमाण नपुगेका भन्दै अधिकारीलाई सरकारी चितवनका वकिलले मुद्दै नचलाई असोज १६ मा छाडिदिएका थिए । त्यसपछि रुष्ट अधिकारी दम्पतीले न्याय नपाएको भन्दै फेरि अनशन सुरु गरेका हुन् ।

No comments:

Post a Comment

बेनाममा अरुलाई गाली गलौज गर्दै जथाभाबी कमेन्ट लेख्नेहरु लाई यो साईटमा स्थान छैन तर सभ्य भाषाका रचनात्मक कमेन्ट सुझाब सल्लाह लाई भने हार्दिक स्वागत छ । तल Anonymous मा क्लिक गर्नुश अनी आफ्नो सहि नाम र सहि ईमेल सहित ईंग्लिश वा नेपाली मा कमेन्ट लेखी पठाउनुश, अरु वेबसाईट र यस् मा फरक छ बुझी दिनुहोला धन्यवाद । address for send news/views/Article/comments : Email - info@nepalmother.com - सम्पादक