मन्त्री बनाउँछु बनाउँछु !

 कान्छा !   

सके तिमीलाई मन्त्री बनाउँछु  

नसके तिम्रीलाई मन्त्री बनाउँछु

त्यो पनि सकिन भने, 

तिम्री बाहिरियालाई मन्त्री बनाउँछु

मन्त्री बनाउँछु बनाउँछु 

कान्छा, चिन्तै नगर !

मै हुँ महाराज अहिले 

मै हुँ जङ्ग बहादुर अहिले 

मैले जे गरे पनि हुन्छ 

जसो गरे पनि हुन्छ 

हेरौँ मलाई कसले छुन्छ !  

ढुक्क भएर मेरो भर पर 

मलाई विश्वास गर 

म मन्त्री बनाउँछु बनाउँछु 

राजदूत र अन्य पद बाँकी नै छन् 

नभए अध्यादेश ल्याउँछु   

साला, साली, धर्म छोरा, छोरी 

आसे पासे, नाल नाता, ससुराली   

खेर फाल्ने छैन कसै गरी 

आलो पालो, सबैलाई गर्छु  

मलाई विश्वास गर 

म मन्त्री बनाउँछु बनाउँछु 

नपत्याए हेर आजको लिस्ट !

तिमी राष्ट्रघाती होऊ या जे सुकै होऊ 

मलाई समर्थन मात्र गर 

मेरो आरती मात्र उतार 

कान्छी, मलाई विश्वास गर 

म मन्त्री बनाउँछु बनाउँछु ! 

- रामप्रसाद खनाल, जुन १०, २०२१