कविता : हैजा

भाग बिलो लगायौ आखिर 

लगाउनै नहुने त्यहाँ पनि....,

र त्यो पनि !

खसी बोकाको मासु, 

बिलो लगाए जसरी गाउँमा !

दियौ पनि 

लियौ पनि  

पायौ पनि 

खायौ पनि 

लयौ पनि 

भयौ पनि 

गयौ पनि

एकाएक,  

हैजा सुरु भैसकेको छ गाउँमा अहिले 

भाग पाउने लखतरान छन्

गर्छन् आँगनको डिलमा बसेर 

उक्क उक्क ! 

गर्दा गर्दा बान्ता,

आउँछ तितो पानी मात्र मुखमा 

आन्द्रा भुँडी निस्केला जस्तो 

अहो नसोध 

भैराछ कस्तो कस्तो ! 

औषधीले काम गर्न छोडेको छ अहिले 

तर, 

भाग बिलो लाउने 

पाउने  

खाने

जाने

लाने 

यिनीहरूलाई लाग्नु पर्ने हैजा 

एक जनालाई मात्र लागेको छ अहिले सम्म 

फैलिन बाँकी छ गाउँमा अझै 

सुरुवात मात्र भएको छ एक ठाउँमा 

लौन हैजा, 

आइज यिनीहरूलाई लैजा !

किनकि बँचाउनु छ सिङ्गो गाउँ

हैजाको महामारीबाट !

- रामप्रसाद खनाल, अक्टोबर २६, २०२१