एकीकृत नेकपा माओवादी नेताका छोराछोरी विदेशमा पढ्ने गरेकोमा अखिल क्रान्तिकारीको १८औँ राष्ट्रिय सम्मेलनमा विरोध !

एकीकृत नेकपा माओवादीको विद्यार्थी सङ्गठन अखिल क्रान्तिकारीको १८औँ राष्ट्रिय सम्मेलनमा विद्यार्थी प्रतिनिधिहरूले नेताका छोराछोरी विदेशमा पढ्ने गरेकोमा विरोध गरेका छन् । शनिबारदेखि कीर्तिपुरस्थित त्रिभुवन विश्वविद्यालयमा जारी बन्दसत्रमा १२ वटा राज्य समितिका विद्यार्थी प्रतिनिधिमध्ये केही प्रतिनिधिले जनताको छोराछोरीले विद्यालयमा पढ्न नपाएको बेलामा नेताहरूले विदेश तथा काठमाडांँैका महँगा स्कुल, क्याम्पसमा पढाउने गरेकाप्रति विरोध गरेका हुन् । बन्दसत्रलाई व्यवस्थित गर्नको लागि निवर्तमान उपाध्यक्ष रामदीप आचार्यको संयोजकत्वमा गठन भएको अध्यक्ष मण्डलमा मदन अर्याल, बैद्यलाल सरदार, सुनिता राई र नरेन्द्र न्यौपाने सदस्य रहेको राष्ट्रिय सम्मेलन प्रचार उपसमिति संयोजक जागृत....
रायमाझीले जानकारी दिनुभयो । समसामायिक परिस्थिति र विद्यार्थीका मुद्दामा रिपोर्टिङ गर्ने क्रम नसकिएकाले आइतबार पाँचवटा राज्य समितिले रिपोटिङ गर्न सकिएपछि एकीकृत माओवादीका नेताहरूले र विद्यार्थी नेताहरूले प्रशिक्षण दिने र त्यसपछि विभिन्न प्रतिवेदनमाथि छलफल सुरु हुने उहाँले जानकारी दिनुभयो । त्रिभुवन विश्वविद्यालय स्ववियु सचिव मानुषी यमि भट्टराईले तीनजना विद्यार्थी अध्यक्षको चर्चामा रहे पनि निर्वाचन नहुने स्पष्ट पार्दै नेतृत्व गौण नीति प्रमुख भएको बताउनुभयो । उहाँका अनुसार आगामी नेतृत्व सहमतिको आधारमा हुने भएकाले जुनसुकै विद्यार्थी नेता अध्यक्ष हुनसक्ने बताउनुभयो । 'जनताको गणतन्त्र, राष्ट्रिय स्वाधिनता र जनशिक्षाको पक्षमा एकताको १८ औँ सम्मेलन' भन्ने नाराका साथ शुक्रबारदेखि सुरु भएको राष्ट्रिय सम्मेलन आउँदो २८ गतेसम्म चल्नेछ । सम्मेलनले नयाँ शिक्षा नीति र सर्वसम्मत रूपमा नयाँ नेतृत्व चयन गर्ने विद्यार्थी नेताहरूले बताएका छन् । बिहान ११ बजेदेखि सुरु हुने भनिएको बन्दसत्र आन्तरिक तयारीको कारण केही घण्टा ढिलो गरी सुरु भएको थियो ।